CSV.1.6.010 Awesiinyag Mendidojib Gidizhitwaawininaan
Ingoding gii-taawag aanind anishinaabe iwidi Manoominikaang. Gaawiin gegoo ogii-misawndanziinaawaan. Ogii-mamoonaawaan eta waa-aabajitoowaad miinawaa gii-ashangewag (wiikongewag) da-miigwechiwi'iwewaad.
Baanimaa ogii-ani-wanendaanaawaan odizhitwaawiniwaan. Gaawiin geyaabi gii-paatayiinosiiwag giigoonyag. Gaawiin dash geyaabi gii-minoginzinoonan ogitigaaniwaan. Gii-ani-maajaawag waawaashkeshiinyag. Gii-ani-gawanaandam Anishinaabe.
Bezhig anishinaabe ogii-naanaagadawendaan gaa-izhi-maazhiseg. Ogii-kikenimaan ezhi-maajaawaad gaagaagiin miinawaa aandegwan. Ogii-ineminaan iniw waawaashkeshiinyan izhi-biminizha'aawaad. Gii-ani-kii'igoshimo gaye wiin gaa-izhi-biminizha'aad iniw bineshiinyan Giiwedinong akeyaa.
Eshkam gii-shaagwiiwii biminizha'iwed. Gegapii gii-wanendamaa. Ojiichaagwan dash geyaabi giiwedinong akeyaa gii-izhaawan ganawenimigod gidoodeminaanig. Gii-tagoshin noopiming gii-tazhi-maawanji'idinid bineshiinyan.
Ogii-kagwejimaan, "Aaniin gaa-onji-makamiyaang waawaashkeshiinyag? Nindapenimonodawaanaanig da-wiisiniyaang miinawaa da-biizikiiganikeyaang." Ogii-nakwetaagoon: "Gaawiin ningii-izhichigesiimin. Gaye niinawind nindapenimonodawaanaanig da-bimaadiziyaang. Ningii-piminizha'aanaanig gii-maajaawaad. Gigii-nishiwanaajichigem. Gidaa-gaagiizomaawaag. Giga-bagidinigoo da-nazikawadwaa."
Niigaan gii-izhaa ani-waabamaad waawaashkeshiinyan gitigaaning. Gii-ani-mawi naazikawaad iniw ogimaawi-waawaashkeshiinyan. Gii-wiindamaage a'aw waawaashkeshiinh gaa-onji-maajaawaad gii-mino-doodaagosinig anishinaaben. Geget ogii-andodamawaan iniw Ogimaawi-waawaashkeshiinyan da-azhe-giiwenid.
Ogii-wiindamawaan ge-izhi-azhe-giiwed da-gikinoo'amawaad wiijanishinaaben da-gwayako-bimaadizinid. Ogii-apiitenimaawaan iniw anishinaaben epiichi-bagidinamawaad wiijanishinaabeni. Gii-tebwetaadiwag inaakonigewaad da-azhe-giiwewaad. Yo'ow izhichiged, gii-azhe-giiwewan owiiyawing ojichaagwanan. Zhayegwa gii-pi-azhe-giiwewan waawaashkeshiinyan gii-koshkozid.
Gaa-ako-inakamigak ani-maajaawag waawaashkeshiinyag endaso-gikinoonowining ani-ishkwaa-agoojinid aniw Manoominike-giizis(oon) da-dazhimaawaad iniw gaayosenijin gaa-manaaji'igowaajin miinawaa gaa-manaaji'igosiwaanijin. Gaa-manaaji'aajig apane oga-mikawaawaan waawaashkeshiinyan miinawaa da-minosewag.